– Әле, ярый, яшь гомерне, – дисең, –
Үкенмәслек итеп уздырдым.
Син шуны әйт: дәртең-дәрманыңны
Нинди гамәлләргә туздырдың?
– Ташпулатлар корып куймасам да,
Яшәмәдем калып мескенгә.
– Кайдан килде малың, кая китте,
Кеше хакы юкмы өстеңдә?
– “Надан” дигән мөһер сугалмаслар,
Гыйлем эстәү – сөйгән шөгылем.
– Ә халкыңа файда китердеңме,
Сарыф итеп акыл-фигылең?
Үз-үземнән хисап алам шулай,
Аулак уйга качып, көн үткәч...
“Милләтенә ни мирасы калды?” –
Дип сорарлар әүвәл, мин киткәч.
Авторлар исемлеге
