Көйлә

Үч алырсың, көнләшерсең, дускай,
Ачу белән кызып йөрерсең...
Тукта! Елмай әле!
Син үзең дә Ходай бүләге бит.
Көчлерәк соң кемнең беләге, дип –
Көрәшмә дә, сынашма да бүген.
Өлешеңә тигән көмешең бит,
Үзеңнең дә әле тормышыңа
Аяк атлап кына керешең бит.

Кеше хәсрәтенә сөенәсең,
Ә уңышын күреп – көясең.
Авыр хәлдә калса - көләсең...
Бу халәтнең ялгыш икәнен дә
Кайчак, беләсең...
Күңелеңне көйлә!
Әгәр бүген аны көйләмәсәң –
Иртәгә бит авыр булачак.
Бүгенге үч сине буачак...

Күршеңә бәхет теләсәң,
Икеләтә сиңа килер.
Ышан.
...Мин дә бит бер бәхетне яулар өчен,
Сиңа бәхет теләп, тырышам...